Lyrics Regragi Style - Balti

ناري على بلادي واليوم راهي محقورة
بلادي مقهورة والناس تحكي على الكورة
ياو دورة دورة ما فمّا كان الغورة
شطرها صبّابة الباقي تحبّ المقصورة
من غير مانجامل ياو نحكي برجولية
عتارس حفيانة ولات غربي بالليـــّة
رجالكم غدّارة الغدرة موش رجولية
وادكم الحمار نعاود موش فرد ثنية

الشيخ راكب فوق الحمار وحنا الذرية ورا الكريطة
قالو الحكمة في ريوس الكبار لقينا توريطة ورا توريطة
تبعنا الشيخ اللي خرف لقينا كان الكف ورا الكف
وجراد كلالك زرعك وتلف شعبك عل الخبزة شادد الصفّ
هذا هو الكذاب اللي حلف يعرف ربي ونبينا
صدقتو وعدو بكم خلف هذا اللي عملناه بيدينا
هام هام قالو يخافو ربّي هام قالو اللي طافو بالكعبة
الحاكم في الباقات يعبي الحاكم اللي يسربي في اللعبة
بشبابك مقهور وموضام شعلت فيه النار فتيلة
لايرقد ليلة ورا ليلة يسكر يتكيف في فتيلة
حومة ما باليد حيلة يا حارق حارق ومحروق
باش ينسى وبالدواء مخنوق ديبلومي سباطو مفلوق
مستقبل ياسر فلو عجعاجي مشوي نصبة ومرقاز
مرشي نوار بواط وقزاز والا صبّ على روحك القاز
تونس بلاد النشاز يزي من نهقة البهيمة
في الضبعة وضحك في كرسيه الضحكة اللي بكات لمّيمة

دعسة في الحومة لتوة قطع بالسكينة
لكلو مضام لا تبكي يا لمّيمة
صار عليّ صار ما صار في البريمة
بعد الضبعاوي حكمونا ولاد البهيمة

اليوم ولات لعبة رصاص ملك الموت قاعد أون فاس
قديمة الضربة اللي في وجهك اليوم ولّى كرطوش في الراس
عادي تلقى مخ عالحيط البلاد بطبيعتها عالحيط
ولاد الحومة قاعدة عالحيط تستنى في الحرقة في الخيط
يزي ما الحومة سوفرات كلاو الخبزة صاحبي سوفلات
رجال اندادي مشات قفات من بكري محشي زادت تحشات
الرجالة سكرت سحاب نفس الديكور شراب واصحاب
ما انا قلنا لحمامهم غراب شدو خرب وزادو الخراب
مالشيخة العيون ذبالة حالة تكبلت اليوم زبالة
قلوب معبية كيما البوبالة نسانا في سوريا اليوم حبالة
جينا في حكومة نشالة سرقت سطوشك وسطوشي
لاني إسلامي ولا قوشي تونسي زوالي شادد حوشي
نغنّو والا ما نغنّوشي والا نخليو الفم امبوشي
الشكشوكة في سوم السوشي قسمتو خليتونا بلوشي
يزي ما بكات الرجالة البلاد مشات سوق ودلالة
جيعان دارو بيه الوكالة اش كلات فيه ما كلات النمالة

ناري على بلادي واليوم راهي محقورة
بلادي مقهورة والناس تحكي على الكورة
0ppa Regragy Style
0ppa Regragy Style
زوالي ضارب طاير محقور ياو ديما حاير
شعب بلادي ضارب طاير مسكين زوالي وحاير