Lyrics Ya Sah - Shelat

ياصاح جنَب لا تجي مرتع الريـم
حاذور من سهم ٍ مع الجو طايـش
سهم ٍ من أقواس الحدق فيه تسميم
جرحه عميق و يودع الفكر دايـش
يرميه خشف ٍ ما يهـاب المواثيـم
توه صغير السن بالزيـن شايـش
و إلا عنـودٍ تدهـل القلـب و تقيـم
ترعى الحشا بين الضلوع المشايش
نجل العيون اللي هدبها صواريـم
من لاعته ناشه من الموت نايـش
كم فارس ٍ قبلك تجزع من الضيـم
مطروح لا يقوى و لا هو بـ هايـش
تعرضن لـــه ضامــرات المحـازيـم
أهل القـدود المترفـات النشايـش
و تبششن لـه بالثمـان المناظيـم
و أثر البلا من عقب هاك البشايـش
كم ضحكة ٍ سرت قلوب الشغاميـم
و عقب الهنا و الضحك جرت بلايش
هذا الهوى مبداه قطر ٍ مـن الغيـم
و أتلاه أنقع من سمـوم الهوايـش
و العشق وأهل العشق سقم ومساقيم
كم واحد ٍ ميت و لو كان عايـش
انشد عِلِيم وخـل عنـك التواهيـم
و احذر و لو حاشك من النفس حايش