Suspirannu

Mi votu e mi rivotu suspirannu,
passu li 'nteri notti senza sonnu,
e li biddizzi tòi vaiu cuntimplannu,
li passu di la notti finu a ghiornu,
Pi tia non pozzu n'ura arripusari,
paci non havi chiù st'afflittu cori.
Lu vo' sapiri quannu t'aju a lassari
Quannu la vita mia finisci e mori.

Ci penzi quannu nsèmula abballammu
e a siritina cchi sonu tinemmu?
Ntra l'occhi tutti dui ni taliammu,
n'arrussiau la facci e poi ridemmu;
abballannu e suspirannu
li manu n'affirrammu e ni stringemmu...
Lu vo' sapiri quannu t'aju a lassari?
Quannu la vita mia finisci e mori.