Songtexte Simmo 'E Napule Paisà - Peppino di Capri

Tarantella, facennoce 'e cunte
Nun vale cchiù a niente
'O ppassato a penzà
Quanno nun ce stanno 'e tramme
'Na carrozza è sempe pronta
'N'ata a ll'angolo sta già
Caccia, oje nenna, 'o crespo giallo
Miette 'a vesta cchiù carella
Cu 'na rosa 'int' ê capille
Saje che 'mmidia 'ncuollo a mme
Tarantella, facennoce 'e cunte
Nun vale cchiù a niente
'O "pe' comme" e " 'o ppecché"
Basta ca ce sta 'o sole
Basta ca ce sta 'o mare
'Na nenna a core a core
'Na canzona pe' cantà
Chi ha avuto, ha avuto, ha avuto
Chi ha dato, ha dato, ha dato
Scurdammoce 'o ppassato
Simmo 'e Napule, paisà
Tarantella, 'stu munno è 'na rota
Chi saglie 'a sagliuta
Chi sta pe' cadè
Dice bbuono 'o detto antico
A che serven i denar
Ogge a tte, dimane a mme
Io, 'nu poco fatto a vino
Penzo 'o mmale e penzo ô bbene
Ma 'sta vocca curallina
Cerca 'a mia pe' me vasà
Tarantella, si 'o munno è 'na rota
Pigliammo 'o minuto
Che sta pe' passà
Basta ca ce sta 'o sole
Ca c'è rimasto 'o mare
'Na nenna a core a core
'Na canzona pe' cantà
Chi ha avuto, ha avuto, ha avuto
Chi ha dato, ha dato, ha dato
Scurdammoce 'o ppassato
Simmo 'e Napule, paisà
Tarantella, 'o cucchiere è 'n'amico
Nun 'ngarra cchiù 'o vico
Addò m'ha da purtà
Mò redenno e mò cantanno
S'è scurdato 'o coprifuoco
Vò surtanto cammenà
Quanno sta a Santa Lucia
"Signurì", ce dice a nuje
"Ccà ce steva 'a casa mia
Sò rimasto surtant'i'"
E chiagnenno, chiagnenno, s'avvia
Ma po' 'a nustalgia
Fa priesto a fernì
Basta ca ce sta 'o sole
Basta ca ce sta 'o mare
'Na nenna a core a core
'Na canzona pe' cantà
Chi ha avuto, ha avuto, ha avuto
Chi ha dato, ha dato, ha dato
Scurdammoce 'o ppassato
Simmo 'e Napule, paisà