Songtexte Feiss u Wyss - Tinu Heiniger

Si hocket feiss u wyss u schwär
Höch über em Dorf, isch meischtens läär
Zeut d'Stunge lut tagy, taguus
U lütet y u lütet uus

Der guldig Güggu zoberscht chräit u dräit
Sich nach däm Wind, wo grad so wäit, so wäit
U mängisch, säute, tönt dür ds Dach
Uus e Choral i ds Tal vom Bach

Doch meischtens ghöre au die Lütt
Wo are düreloufe vore nüt
S'gseht uus, wie we si nüt meh z'säge hätt
Der Ychoufslärm isch lüter duss, aus dinn ds Gebätt

U si isch protestantisch, evangelisch, reformiert
U meischtens zue
D'Lütt säge: Lue
Si hei d'Fassade renoviert

U dä, wo bleich u grau ir Stube mau
Vieu Büecher het studiert
U wo doch gschyder mau es wiuds
U verruckts Läbe hätti gfüehrt
Dä redt vor Kanzu im Talar
U redt i Jeans vor bim Altar
Zu dene Lütt im Schiff
Wo's no nid hei verla
U tauft mau hie es Ching
U traut mau dert es Paar

Seit, dass der Herr, dä mit em Chrüz
Ou üs u üser Sünde treit
Seit, dass der Herr, dä dert am Chrüz
Üs ou us üsne Ängscht befreit
List, was der Herr het ta u gseit
Seit, wie's der Herr heig ta u gseit
U redt u lehrt, wien är's het glehrt
U lehrt doch nume das
Won är vo sich
U vo sim Läbe hie versteit

Der Herr hockt vor im Chor im Fäischter
Lächlet müed, verlade, smart
Het längi, pflegti Haar u hocket
Zmitts i Ching mit längem Bart
Das isch der Heiland, weisch dä Typ
Vor Tante us der Sunntigsschuel
Früsch bbadet gföhnet, hocket dä
Ganz friedlech dert
Im schöne Garte
Uf sym Gartestuehl

U wo isch dä, wo tagelang
Ir Wüeschti mit sich sälber ringt?
Dä, wo a sich dert zwyflet
Dä, wo Angscht het u sy Wäg nid fingt?
Wo dä, wo mit de Dealer denn
Im Tämpu inn het Lämpe gha?
U wo se när het usegheit
Dä fählt hie inn, dä wiud, jung Ma
Wo du töif i dir inne hesch
U won i töif i mir inne ha

Si hocket feiss u wyss u schwär
Höch über em Dorf, isch meischtens läär
Zeut d'Stunge lut tagy, taguus
U lütet y u lütet uus