Lyrics Pardong - BAP

Entschuldijense, dat ich jetz singe he,
Dat ich he stühre deit mir wirklich sehr leid. Pardong.
Ich hann et och jemerk: Ich pass janit her.
Dat zozejevve fällt mir wirklich sehr schwer. Pardong.
Wo ich noch nit ens richtig Hochdeutsch kann.
Verdamp, wat soll ich he bloß singe, Mann?
Ach, künnt ich jetz doch irjend e Schanksong,
Dann brööt ich nit esu om Schlauch zo stonn. Pardong.
Nä, wie ich och ald widder ussinn hück:
Ming Pickel nur provisorisch ussjedrück, om Klo,
Nohdämm ich vill ze dünn jeschesse hann,
Obwohl ich sons öm die Zick janit kann.
Dat ess dat Lampenfieber janz bestemp,
Dat och als Schweiß mir durch de Poren dring.
Un ussjerechnet hück noh Knoblauch stink,
Dat fing ich schicksalsmäßig einfach link. Pardong.
Wann ich et letz ming Strömp jewähßelt hann
Ess hück ejal, ich hann jo Stivvel ahn - wa Jung?
Joot ess, dat keiner he treck vüür mir steiht,
Dä hätt ich nämlich lang ald naaßjespeut. Pardong.
Weil ich beim Singe immer seivre dunn,
Och dofür bitt ich um Entschuldijung,
Denn schließlich weiß ich wie mer sich benimmp,
Sulang ich einjermaßen nöchtern benn. Pardong.
Ach, wenn ich doch jetz he em Anzoch stünd,
Nett, met Niveau un jet Flamenco künnt - Olé!
Un dann zwei bess drei Bonmots drop hätt,
Gemäßigt kritisch bis verschmitzt kokett - he, he!
Auf Wunsch französisch singend - durch de Nas -
Kröff ich üch bess zum Ahnschlaach en den Arsch.
Sulang de Kass stemp, wööt ich nit ens ruut.
Mir jing et joot als Kleinkunst-Prostitut. Pardong.