Lyrics Naccordo In Fa - Sergio Bruni

Tenevo
'Na paciona 'e 'nnammurata, affeziunata, semplice e gentile
Doppo tre anne
'A capa ll'è avutata e ll'è venuto 'o sfizio 'e mme lassà
Stò contro a tutt' 'e ffemmene pe' chesta 'nfamità
E 'na vendetta nera voglio fà

Mm'ho comprato 'nu mandulino
E mme metto for' 'o balcone
Quanno passa 'na signurina
Lle cumbina 'n'accordo in "Fa"
Po' lle canto chistu sturnello
Ch'è capace d' 'a 'ntussecà

Fli-ppò, Fli-ppò
Fli-ppò, Fli-ppò
Fiore di primavera!
La donna tiene i peli sopra il cuore
E io nun mm' 'a pigliasse pe' mugliera
Nemmeno se me l'ordina 'o duttore!
Parola mia
Parola mia d'onore!

Diceva: "Tu sî tutt' 'a vita mia
E si mme lasse teng' 'o vetriuolo!"
E mme guardava
'Mmocca pe' gulío 'a 'n'atu mese avevam' 'a spusà
Nèh, chella 'o juorno quinnece mme dice chesto a me
'O sidece nun se fa cchiù vedè

E pe' chesto, c' 'o mandulino
Io mme metto for' 'o balcone
Quanno passano 'e ssignurine
Lle cumbina 'n'accordo in "Fa"
Po' lle canto chistu sturnello
Ch'è capace d' 'a 'ntussecà

Fli-ppò, Fli-ppò
Fli-ppò, Fli-ppò
Fiore di primavera!
La donna dice: "Una capanna e un cuore"
Ma, quanno vede 'e ccarte 'e mille lire
Se mette pure cu 'nu scupatore
Parola mia
Parola mia d'onore!

Succede
Ca mm'compro 'nu giurnale
E trovo scritto: "Rosa Imperatore
Oggi si sposa
Con il tal dei tali" e chist' è 'o juorno ca mm'aggi' 'a spassà
Faccio 'na cosa semplice ca ll'ha da fà svenì
Dite: Ma che lle faje? mo v' 'o dich'i'!

Mme ne jesco c' 'o mandulino
E mme metto fore 'o purtone
Quanno passano gli sposini
Lle cumbino 'n'accordo in "Fa"
Po' lle canto chistu sturnello
Ch'è capace d' 'e ffà schiattà

Fli-ppò, Fli-ppò
Fli-ppò, Fli-ppò
Fiore di primavera!
Chist'è 'nu matrimonio per amore
Ma tu, mio caro sposo, sta' sicuro
A San Martino vaje a fà 'o priore!
Parola mia
Parola mia d'onore!
Parola mia
Parola mia d'onore!