Lyrics Läbe Wie Ne Chatz - Tinu Heiniger

Sit Tage ligi uf däm herte Tannelade
I ha so Angscht - im Labor näbedrann wartet uf mi der Tod!
Bim Fänschter vore geit jetz langsam d' Sunne ache
U d' Bärge, d' Wulke dert am Himel lüüchte orangerot!

Ou i mir inne wäri so ne Sunne
E Gluet, es Füür, so tierisch heiss u rot u stolz!
Mys Füür isch us, isch us, bevor dass' mal hätt brunne -
Sit Tage ligi abglöscht uf däm Brätt us Tanneholz!

U i wett nume eis: i wett hie wieder use!
Mit eim Satz zwüsche dene Hüser ache ufe Platz
U ab dür d' Büsch u d' Strass z düruf uf ds Fäld ga muuse!
I wott ja nume eis: wott läbe, läbe wie ne Chatz!

Doch lg! I bi ne Chatz usere Zucht
U i warte uf mys Änd!
U vor dr Labortüre steit:
"Medizinisches Experimänt!"

I wär e Tigerchatz mit länge, spitze Ohre!
Verwäge, wild u unberächebar u schampar schnäll!
Wär gheimnisvoll, wär elegant, schön wie ne Moore!
U hätt es fyschtertschäggets, silberglänzigs Fäll!

U myner Ouge: klari, gälbi Bireschnitze!
U gschpänschtig, gfürchig gsächsch se lüüchte i der Nacht
Nenei! Di wäre nid so abglöscht, grau, verhänkt wie jetze
Nachdäm me mi pär Liferwage het hiehäre 'bracht

Verschteisch! I wett ja nume eis: i wett hie wieder use:
Mit eim Satz zwüsche dene Hüser, ache ufe Platz!
U ab dür d' Büsch u d' Strass z düruf uf ds Fäld ga muuse!
I wott ja nume eis: wott läbe, läbe wie ne Chatz!

Doch ig! I bi ne Chatz usere Zucht
U i warte uf mys Änd!
U vor är Labortüre steit
"Medizinisches Experimänt!"

I warte uf my Sprütze, uf my Vounarkose!
U dä, wo mi mal holt gsehn i scho vor mir sta:
Im wysse Schurz, i syne Bügelfaltehose!
Dä fein, nätt Herr, wo jährlech "muess" sächzg Chatze dürela!

"Jedesmal mues mi überwinde!" seit er ärnscht u leit mi
Bi sich im Labor äne uf sy Arbeitstisch!
E Stich i Buuch - u i bi wäg! Und är zerleit mi
Mit Mässer u mit Gable, wie ir Beiz e Fisch!

När fahrt er hei zu Ching u Frou u Swimmingpool
U wenn är när i Salon chunnt - ligt uf sym Fänschterplatz
E Chatz, e Moudi, whiskasfeiss u träg u fuul -
Am Tag druf steit im Gschäft der Liferwage ufem Platz!

Di nächschte Chatze us're Zucht
Di warte dert uf ihres Änd!
's git äbe Tier wo läbe!
U 's git medizineschi Experimänt!