Lyrics Mi Dällebach - Tinu Heiniger

Du gumpisch vor Brügg
Flügsch dervo, chunnsch nümm zrügg
U jetz tribsch wie ne tote Fisch
D'Aare zdürab
Der Fluss wird e See
Aus isch guet s'tuet nümm weh
U jetz ligsch dert im Schilf
U der See isch dis Grab

E Gump u aus isch verby
U jetz flügsch nöime hi
Aus, o d'Liich dert im See
Geit di nüt meh a
Was du bisch, was d'bisch gsy
Das vergässe mir nie
U mir lache, s'tuet o weh
Du bisch furt u bisch no da

Höch über Bärn im Stärnemeer
Da zieht e Stärn schön u häu
Uf sir Bahn zieht dä Stärn
Über Bärn siner Runde
Höch über Bärn gseh ni dä Stärn
Das bisch du
Du mi Dällebach, du
Oh, wie ha ni di gärn

D'Stärne lüchte im See
U der Kari weiss meh
Het si Spott u si Witz
U sis Härz üs hie gschänkt
Liebi chunnt, Liebi geit
U wo's mäiht, da mäiht's breit
Mängisch wüsse die meh
Wo der Schmärz hei ertränkt
Mängisch wüsse die meh
Wo der Schmärz hei ertränkt