paroles de chanson Òran Fir Heisgeir (Gura Mis' Tha Fo Mhìghean) - Julie Fowlis

Gura mis' tha fo mhìghean,
'S mi leam fhìn air a' chnoc,
Fada, fada, bho m' chàirdean,
Ann an àite ri port;
Gus am facas do bhàta,
Le siùil àrda ri dos,
Tigh'nn a-steach chun na h-Àirde
'S mac an àrmainn air stoc.
Mac an àrmainn air stiùir,
A tigh'nn a dh' ionnsaidh an Troit;
Gu bheil an caolas a' beucadh,
'S muir ag èirigh mu slait;
Tha do làmh-sa cho gleusta,
'S nach do thrèig ise neart;
Ged a thigeadh muir dubh-ghorm,
Chuireadh sgùradh a-steach.
'S ged bhiodh cìosnachadh mar' ann,
'Bhuileadh barraibh a crann,
'Chuireadh dh' ionnsaigh a slat i,
'S luaithe h-astar na long;
Bhiodh i aigeannach, aotrom,
'G èirigh eadar gach gleann,
'S muir a' bualadh mu darach,
'Fuasgladh reangan is lann.
Bu tu sgiobair na fairge,
Bu tu fear falmadair grinn,
Gur tu b' urrainn a stiùireadh,
'Nuair a dhiùltadh iad i;
Ged a bheireadh iad thairis,
'S iad na laighe 's an tuim,
Chumadh tusa i cho gàireach,
Gus an tàrradh i tìr.
Chan eil aon rubha cladaich,
Eadar seo 's a Chaoir-dhearg,
Eadar Lìte 's gach cala,
'N dèanta fantainn neo falbh;
Chan eil maighstir soithich,
Chuala feothas do làimh,
Nach bi faighneachd, 's a feòrach',
Càite faighte do bhàt'.
Iùbhrach àlainn, 's i fallainn,
'S i ri gabhail a' chuain,
I ruith cho dìreach ri saighead,
'S gaoth na h-aghaidh gu cruaidh;
Ged bhiodh stoirm chlacha'-meallain
Ann, 's an cathadh a tuath,
Nì Fear Heisgeir a gabhail
Làmh nach athadh ro 'n stuaigh.
Tha Fear Heisgeir a' tighinn;
Bu tu ceann-uidhe nan ceud,
Bu tu ceann-uidhe na cuideachd,
'S cha bu sgrubaire crìon;
'N àm ruighinn do bhaile,
Seal mu 'n cromadh a' ghrian;
Bu tu mac an deagh athair,
Bha gu mathasach riamh.