Alpha

Soms voel ek me de vroege veugel in et wormgat
Droog ek de troan die vaste in et oog van de storm zat
Vien ek et type inhoud die in iedere vorm past
En tref ek e flits die vroeger hoog boven de norm stak
Soms zienk e domino die ossan bluft rechtstoan
E spel O X O woa dat er niet in de weg stoat
De kromme enscenering in de gruwelijke rechtstoat
De scheve stoner die wel continu in ze recht stoat
Af en toe ziek lik e naald in een ooiberg
De werkende geleider in e kabel die noois werkt
Kzien e gevangn veugel die azo ut ze kooi brikt
De vlamme in de pupe die tverdachte allooi fikt
Soms ziek de latsten voe te zeggen dak den eerstn zien
Twee compartimenten die versmelten toet 1 ding
De tegenpool van de populistische mening
En tgeheel da verschooln zit in de verdeling
Ik zien et uppervlak da diepe no binn richt
Tverlies da verborgen in et middn van de winst ligt
E mens upt et perron dat terzelfdetijd in de tring zit
Soms ziek de externe drift in een instinct
De dakloze mens die elke dag in een hus slapt
Et stille woater die een oorverdovend gelud makt
De naakte woarheid in e gesloten cadeau daj utpakt
De bubbel, die openspat int kosmische bruisbad
De thusbluver die up weg is up utstap
Soms ziek de utbuiter die binn t'intividu stapt
De plantrekker die ieder ki nood an hulp et
Soms ziek de literaire leegte in e vulpen
Ik zien de loodrechte noot ut e dwarsfluit
De agorafobist die vertrouwd up de markt sluipt
De behapbare brok die veel te groot is
Et leven dat estetisch zit veborgn in e doodskist
Ik zien de paradox daj juste kut oplossen
De tegenstelling die nie contrasteert en nie ophokt
De kele die de dust in e lege beker kut opslokken
De gebiedende wijze in e verbodsbord
Soms ziek de honger die vortdurend gestild wordt
Et recyclerende, conserverende die verspild wordt
T'annachronistische da just in de tied past
De onverschilligheid die oois in zuivere spijt zat
Ik zien de leerling da nietn niemi te leern et
Et juste en et affirmatieve dat et verkeerd zegt
Et echte die gebukt oender de faam van fake got
Et afstotelijke die bie naam geprijsd wordt

Soms ziek de liefde die te midden de hoat zit
Et oenverwoardelijke wantrouwen die e moat ript
De woarheid die de leugen verpulvert toet dat ie doodbloedt
De leugenoare die toevallig ze woord oedt
Soms ziek de paster die nergens mir in geloovn kan
Et onderste dat stelselmoating komt an de boovnand
De tale die deur niemand in de wereld gesprookn wordt
Et vier da spreekwoordelijk rechtlijnig de rook vormt
Soms zienk de rapper die zelden et juste woord vient
De geestgezonde menshn die onwetend gestoord zien
De latsten in de reke die et eerste no voorspringt
Ik zien de klank die nergens galmt en die noois klinkt
Ik zien de smart die gelukt voelt
De Titanic die onoverkomelijk stuk spoelt
T'idee in je hoofd da vervolgens concreet blijkt
Et verloren gewoande daj toch nog weerziet
Ik zien et vluchtige da ossan geheel bluft
Et rustige da vele loater woedend uteenstukt
Et zalige da achter e tied geheel corrupt is
De kolossale chaos die voer eeuwig de rust mist
Soms ziek de spegel die gin beeld mi terug schient
Ee traagheid der inerte bewegingn die veel te vlug zien
Ik zien et grotste da in et kleinste vervat zit
De nette strofes van e verre dichter in t'kladschrift
Ik zien de zwakte die met tijde go sterk komn
De middelvinger daj nie presenteert bie e welkomst
De boane die ter plekke bluft en nergens nie utkomt
Et bluvende persistente daj zelden utgomt
Ik zien de donkerte dat soms in et licht boadt
Et individuele onderdeel van e lidstoat
De zonde die soms samen met de deugd, in et gebidt volgt
Et onbewegelijke die soms vlot toet e rit stolt
Ik zien et woater dat et vier an de lont legt
Et luchtige vervliegboare dat toet in de groend werkt
Soms ziek et ene woarin-dat-olles vervat stoat
Et anomiene da nie volt te vangen met e pasport
Ik zien et vrije, dat vaker gevangn zit
Et korste der fragementen die nog ossa te lang, is
De wonde die vorafgoat an e losse verbandkist
T'analfabete protocol dat olles ol lang wist
Ik zien de cirkel die compleet in e box past
Et vastegeroest segment in je innerlijk da ku ontsnappn
Soms ziek de stroming die verre weg van de bron ligt
De vlinder die ol sluimerend temiddn de coccon zit
Soms ziek de schoonheid dat et lelijke omvat
Et roerloze dat em stille houdt in de bombast
Soms ziek et eenduidige da schuilt in et contrast
En soms, de richting dat ontbrikt in e kompas
Ik zien et zwoarste da gin enkel gewicht et
De apathie die niet vermengt met de inzet
Et nutteloze da sowieso ook ze zin et
E pure enthousiasteling da nauwelijks nog zin et
Ik zien et nix dat t'uiteindelijk toet et al makt
De meest up-lettende die toch in de val stapt
Soms ziek et onverwoestboare die in verval rakt
Ja soms zienk d'omega en soms zienk de alpa