Frictie

Ik platsn frictie up begrip ok grote woorden declameren
Dus in essentie ziek me van de fans ant distantieren
Deur olene mo te exprimeren in complexe utingn
Zo ist er bie de luisteroar wa minder overtuiging
Tis nie dak da express doen of dat express deedn
Tis ook nie zo dak imponeren wiln of betweetn
Tis idder zo dak soms te diep wiln specifieren
Woadeure dakke de dingn nie ossan simpel kun phraseren
Eén van me sterktes wordt azo één van me zwaktes
Wuk ziek dermee dak dieper dukn dan de uppervlakte
Ok me boodschap op die wijze nie en massa kun verspreiden
Mor olene mor e kleine minderheid dermee bereikn
Kmoe eerlijk zien dak doar in feite nie bie stille stoan
Dak meestol regios upzoeken woa dak wille goan
Zoender dat er extern e reden is tis instinctief
Dakke de woorden schrieven dus ik zien olene selectief
On ze voe mezelvn nie vlot zoen komn of naturel zoen zien
Nie wetende da vele woorden zo verspild zoe zien
Nie stillestoand bie tfeit dat nie massas gewild zoe zien
En pakt dakt wist wit ek nie of dat er e verschil zoe zien

Want in essentie pen ik puur uit de necessiteit
Sorry kbedoeln de drang die toet expressie leidt
Alli tis lik dat idder e gevolg is
Van wien danke zien in plekke van dak ergens in e rol zitn
En wiln e reputoatie kneedn dat ist nie
Tis e persoonlijk therapeutisch spel woarin dak licht zie
Kgebruikent voe me creativiteit te ventileren
En emoties om te zetten of diep te redeneren
Over zaken die me wakker oedn tis nie express complex
Of lichtjes esoterisch tis meer e soort van etch a sketch
E skribbel van gedachten een uting van gevoelns
Ol leidt da soms toet t'feit da weinig snapt wa dak bedoeln
Mo volgens mien meug je de mens nie oenderschattn
En kuk nie anders dan dak doen ok wiln de route snappen
Die voe mien is utgestippeld dus kwiln men excuseren
Ot soms overkwam lik of dak junder wouden imponeren
Dat ist nie eigelijk wil ek mo geven
Wa dak zelve en gekregen verder filosoferen
Over zaken die me raken en me vaker inspireren
En hopen dak ondertussen anderen kun eleveren
Soms vien ek woorden ut omdak ze doa perfect vien
Omda ze voe mien kunnen duiden wa dak zeggn wiln en echt vien
Tis taal dak ik hanteren lik e schilder die e borstel et
Tis nie etwa woamee dak deur de joarn zwoar geworsteld en
Tkomt ut mezelvn zoender et te moen forceren
Mo ksnappn nu ook beter dak e dialoog creëren
En dus rekening moen oen ok anderen wiln zien floreren
Kbeloofvn nix concreet mo wel dak et goan proberen