Scrollbeweging

Oe kommet daw identiteit missen lik e paspop
En dat de rede em lat leiden lik een hond van Pavlov
We hunkeren nor e volgende dosis dopamine
Ook ol zien we up de hoogte van oe dat da pad aflopt
Nietn weerhoudt us voe te stoppen met de scrollbeweging
Der zien massas dromen en wensen mo weinig onderneming
Vlakgemakt deur de sociale beleving
Die hedendaags nog just bestoat in e digitale omgeving
We conformeren nor imago's die bevallig zien
En teurlijk is da nie olene nu et is van alle tiedn
Mor et groot verschil is de schaal woarup dat et plats vient
De alomtegenwoordigheid die stress in uze dag briengt
Is echt, der vol nie an t'ontsnappen tzit genesteld
In e web woarin daw ol worden betoverd deur nep
Fake verkopt, da noem ek ik et instagram effect
Woa bie dat olles blinkt en de volsche schien gift van perfect
Mo zest ojt deurprikt bluf je e toeschouwer up afstand
Soms ist in et ontkennen daj der et hevigste an vastklampt
T'effect up uze levens is gigantisch
We zien romantisch int negeren van de kost die der an vast angt
De tied goa leern dat we nu ol nie ant spoorn woarn
En ondertussen vult us leven met verloren joarn
Woarin dat we just no lege woorden stoarn
En zonder bevestiging van anderen mor amper kun iets schoons ervoarn

We zien et zwakst ow olene zien
Ze kapitaliseren up de menshen under eenzaamheid
We zien et zwakst ow olene zien
Ze kapitaliseren up de menshen under eenzaamheid

Vraag je je soms of, woarom daj ier up deze plek belandt ziet
Want bie't minste daj een oarm utstrekt speel je snel jen hand kwiet
Der is zovele oaverechts
Weinig die nog woardig werk verzet, we zien gelimiteerd toet wat de boas us zegt
Je boasisrechten worden overboord gesmeten
De condition humaine slepen w'ol sinds de geboorte mee
We moeten ossan mo meer goederen produceren
Consumeren, das de voorwoarde daj als burger voort ku leven
Elk van us is e product da ku verkocht wordn
E wandelende blok an informoatie da ze omvormn
Toet pure statistiek, woa dat er vlug e prijs up plakt
Bepaald deur de precisie woamee daj int algoritme past
Oe vorspelboar dat je handelingn en doaden zien
Oe makkelijk daj zie te plooien no de juste omkoadering
Weinig instellingen die nog echt van woarde zien
Ze werpen licht up zaakn mo k'ontwoaren juste volsche schien
Tzien roare tiedn oj an e website moe bewijzen
Dat je mens ziet deur wa cijfers en letters nere te typen
Oj moe inloggen up een app of oj iemand wilt bereiken
On we massas vele weten mo weinig dervan begriepen
Tis e digitaal doolhof, woarin dat we verdwaald zien
Woa da we weinig kunnen bepaaln van uze eigen verhaallijn
Mo woa dat olles wordt geprogrammeerd, gecodeerd
Toet upt punt dat et menselijke zomo erodeert

We zien et zwakst ow olene zien
Ze kapitaliseren up de menshen under eenzaamheid
We zien et zwakst ow olene zien
Ze kapitaliseren up de menshen under eenzaamheid