Текст песни A Primma 'Nnammurata - Peppino di Capri

Di: E. Murolo/P. A. Ponzo

Ajere, pe′ Tuleto, mme 'ncuntraje
Cu ′a primma e sola 'nnammurata mia:
Ll'uocchie pittate... ddó′ passaje lassaje
Tutt′ 'e prufume ′e na prufumeria.
E a vint'anne turnaje cu stu penziero,
Chilli vint′anne ca nun tengo cchiù.

Ll'ammore è na ferita
Ca ′o tiempo pò saná,
Ma te rummane 'o segno tutt' ′a vita
Pe′ t' ′a fá ricurdá!
Pe' t′ 'a fá ricurdá!

E mme só′ ricurdato na fenesta.
Maria 'mmiez'ê glicínie rampicante,
Doje fronne ′aruta ′mpietto, 'o juorno ′e festa,
Duje curallucce â recchia pe' brillante,
E na vesta cu ′e mmane soje cusute,
Nu poco 'e cipria ′nfaccia e niente cchiù.

Ll'ammore è na ferita
Ca 'o tiempo pò saná,
Ma te rummane ′o segno tutt′ 'a vita
Pe′ t' ′a fá ricurdá!
Pe' t′ 'a fá ricurdá!

E doppo n'esistenza ′ntussecata,
Che ′a vita nosta nu rumanzo fuje,
Essa pigliaje na strada, io n'ata strada,
Ma cu na spina ô core tutt′e duje!
E 'a tant′anne, d' ′e llacreme chiagnute,
N'è rummasa una e nun s'asciutta cchiù.

Ll′ammore è na ferita
Ca ′o tiempo pò saná,
Ma te rummane 'o segno tutt′ 'a vita
Pe′ t' ′a fá ricurdá!
Pe' t' ′a fá ricurdá!