Текст песни Zwärgeland 2 - Tinu Heiniger

I de Höger, i de Bärge, i de Chräche, i de Täler
I de Büro bi de Zwärge sueche d'Zwärge wieder Fähler
Eine, ganz e chline, wo sim Zwärgechef wott gfalle
Stellt am Find vom Zwärgechef e Falle
U der Find vom Chef, dä tschaupet dry
U scho gly druuf isch er, was er gsy isch, gsy

Öpfu, Bire, Nuss
U du bisch duss
Öpfu, Bire, Nuss
U du bisch duss

Mit em heisse Brief ir schweissig, feisse Hand
Geit der Chef zur Oberzwärgefrou im Zwärgeland
U im Zwärgewucheblettli steit
Was der Ängel zu de Hirte, zu de Zwärge seit
U scho tönt's u stinkt's dür ds chranke Bankeland
"Gouner, Fälscher, Münzer, Bankeschänder, Frankehändler
Lumpehung, Vagant"

Lumpe lege, lumpe lege
Lumpe isch scho gleit
Lumpe lege, lumpe lege
Lumpe isch scho gleit

Und ou we der schön, gross Zwärg när häresteit u seit
"Ja, i ha ne dumme, chline Fähler gmacht, es tuet mir leid"
Und ou we si chlini Zwärgefrou när truurig seit
"Zwärgevouk, ja, i bi tschuld, es tuet mir furchtbar leid"
Alls für d'Füchs, für d'Chatz, du grosse Zwärgema
Säuber tschuld, hesch gämblet, jetz muesch ga

Äne, dene, disse, d'Chatz het bschisse
Wie mängs Böueli het sie gleit?
Äne, dene, disse, d'Chatz het bschisse
Wie mängs Böueli het sie?

Nei, mir chline Zwärge wei ke grosse Zwärg
Lang bisch obsi gschwumme, jetz steisch höch am Bärg
Ds glänzig wysse Hemmli het e Fläck, du steisch am Rand
U luegsch lang u läng u müed vo dert i ds Zwärgeland
Du steisch zobersch ufem Gipfu u du weisch, der Tschuep isch uus
U die fiese, miese Zwärge müpfe di jetz überuus

U im Tal ghörsch d'Zwärge jetz holeie
"D'Zwärge hei der schön, gross Zwärg la gheie"
Und es tönt im Zwärgeland dür Bärg u Tal
"Der Zwärg isch gheit, sie hei ne gleit, är geit, Skandal"
"Hesch's gseh? hesch's gseh? Hesch's gläse? Was? Hesch's o scho ghört?"
D'Zwärge sy verruckt u d'Zwärge sy empört

U sie hetze u sie schribe u sie lüge, übertribe
U sie tribe u sie jage u sie hoble u sie sage
U sie brüele u sie foule u sie wüehle u sie joule
U sie chlemme u sie bysse u sie spöie u sie bschysse
Sie müpfe u sie rueche u sie stüpfe u sie flueche
Sie söifere, sie schlyme we sie eine ichelyme

Sie rüehme sich u blöffe: "All die angere sy Möffe"
U sie lächle fies u gröle: "All die angere sy Löle"
"Dir, nei dir, nei dir heit gloge, d'Zwärgefrou het üs betroge"
Ei Zwärg rüeft, nei, gar ke grosse: "Ehrewort, ich säich i d'Hose"
Zit zum schwige, Zit zum rede, e chli lüge tuet e jede
U sie chlage, oh, sie chlage, wie sie schwär i dene Tage
Hie am Zwärgeschicksal trage u der Häuptling seit: "I frage
Nie derna, öbs z'schwär chönnt sy"

Was muess sy, das muess jetz sy
We ds Vaterland am Vater rüeft
De wird im Vaterland der Vater prüeft
U wenn es rüeft, de muess i ga
De wird i prüeft u de säge ja

Triber, Jäger, Jaghüng, Schwinger
Henri Guisan, Ruedi Minger
Schütze, Bläser, Trummler, Jodler
Escher, Käller, Anker, Hodler
Kamarade u Kumpane
Grüesset stolz hie üsi Fahne

Ja, der Häuptling Grossi Lippe
Redt zum Volk u zu sir Sippe
U vom herrlich schöne Bärg
Füehrt der alt u hässig Zwärg
Ds Zwärgevolk i ds fiischtre Tal
U i Kampf für si Moral

D'Zwärgeching, die hocke vor der Glotze
D'Zwärgemueter fingt das alls zum Chotze
U der bös u giftig Zwärgevater
Dä het's gärn, das Affezwärgtheater
"Mou, mir gfallt's, we's chlepft u sprützt u tätscht
Goofe, stellet um, jetz chunnt der Hockeymätsch"

U sie hetze u sie schribe u sie lüge, übertribe
U sie tribe u sie jage u sie hoble u sie sage
U sie brüele u sie foule u sie wüehle u sie joule
Sie chlemme u sie bysse u sie spöie u sie bschysse
Sie müpfe u sie rueche u sie stüpfe u sie flueche
Sie söifere, sie schlyme we sie eine ichelyme
Jaa