Lyrics Canzone Appassionata - Avion Travel

N'albero piccerillo aggio piantato
Criscènnolo cu pena e cu sudore
Na ventecata giá mme ll'ha spezzato
E tutte ffronne cágnano culore...
Cadute só' giá 'e frutte e tutte quante
Erano doce, e se so' fatte amare
Ma 'o core dice: "Oj giuvinotto amante
'E ccose amare tiénele cchiù ccare..."

E amara comme si', te voglio bene!
Te voglio bene e tu mme faje murí!

Era commo canario 'nnammurato
Stu core che cantaje matina e sera...
"Scétate!" - io dico - e nun vò' stá scetato...
E mo, nun canta manco a primmavera!...
Chi voglio bene nun mme fa felice
Forse sta 'ncielo destinato e scritto
Ma i' penzo ca nu ditto antico dice:
"Nun se cummanna a 'o core". E i' mme stó' zitto!

E mme stó' zitto, sí... te voglio bene...
Te voglio bene e tu mme faje murí!

Chiagno p'ammore, e cade 'o chianto mio
Dint'a 'sta testa: 'o chianto 'a sta arracquanno...
Schiòppa 'na bella rosa e i', pe' gulio
A chi mm'ha fatto chiagnere nce 'a manno
Lle dico: "Rosa mia, tu mme perduone
Si te scarpesarrá senza cuscienza..."
Ce sta nu ditto ca mme dá ragione:
"Fa' bene e scorda e si faje male penza..."

Pènzace buono, sí... te voglio bene...
Te voglio bene e tu mme faje murí!