Lyrics Am Dude Jüdd (Live im Millowitsch Theater 1985) - Bläck Fööss

Well mer laache - sich vermaache,
Muß noh'm "Dude Jüdd" mer gon,
Wo se Walzertempo danze,
Wo de Löhrgaß hät et Ganze,
Wo met Schlöppcher - Polkaköppcher
Sich bewäg de Nobeleß,
Wo präzis faß jede Sonndag,
Unter anderm Stammgaß es:

Et Schäfersch Nett, et Schruppe Zillige,
Et Leppenbell, dat danz gewöhnlich d'r Kadrillje,
Et Seife-Klör em Sonndagsstaat,
Alles War vum Tietze Leienad,
Et Schmitze Plünn em fußfrei Röckche,
Et fussich Julche met de lila, lila Söckcher
Un et "Juß", o stäänekränk,
Meschtendeils d'r Dreitritt schwenk.

Su zo schwevve - es e Levve
Für die Stollwercks-Hotvullee,
Keinen Danz weed üvverschlage,
Nor geschweiß un nix em Mage.
Schleif de Lappe - nor berappe
Usus es am "Dude Jüdd" -
Trotzdem sin wie us dem Hüsche,
Spellt de Musik: "Nimm mich mit":

Et Schäfersch Nett...

Immer friedlich un gemütlich
Geiht am "Dude Jüdd" et zo,
ävver nor beß 9- 10 Ohre
Die Gemütlichkeit deiht dore.
Denn vum Driehe - op de Ziehe
Sin nachher se doll un voll,
Alles fängk sich ahn zo plöcke
Un et hät sich met der Woll:

Et Schäfersch Nett...