Lyrics Frauenlobs anckelwyse - Estampie

Ich sach in einen garten gan
Altissimus und sine zwolif dinestman
Er sprach zu in: "Ir hern, ich will uch schencken
So einen selderichen tranck
Clar luter fin alz er am summerbirga sprang
Ir lieben gest, damit will ich uch trencken
Trincket ir seldenriches her
Zwar uch getörstet nymmer mer:
Der ein enpfing des tufels ler
Ach tumme welt, daran solt du gedencken."

Johannes gottes minne son
Peter paulus zu aller zit der beste jon
Mathis mathes des selben rich gesclechte
Filip jacop endre symon
Judam judas thomas sant bartholome so schon
Und ich die loben das hette ich vil gut rechte
Ein abendessen da geschach
Gab unser here für ungemach
Eyn wasser her do got selber sprach:
"Ich wasche eure füße myn lieben knechte."

Sant Peter sprach: "das wer nit recht
Ir sint myn here so bin ich aber üwer knecht
It wescht mir nit die füßsse myn daz geloubet."
"Sant Peter das were missefar
Des riches myn so werst du verwiset gar
Myns vaters fröudt würdestu gar beraubet."
Sant Peter sprach: "Owe der pin
Sol ich von dir gescheiden sin
Nit laß du mich drut schopfer myn
Du weschest beide füße und auch das houbet."