paroles de chanson Nav Vadhu Priya Mee Bavarte - Lata Mangeshkar

INSTRUMENTAL
नववधू प्रिया, मी बावरतें;
लाजतें, पुढे सरतें, फिरतें.

कळे मला तूं प्राणसखा जरि,
कळे तूंच आधार सुखा जरि,
तुजवांचुनि संसार फुका जरि,
मन जवळ यावया गांगरतें.

मला येथला लागला लळा,
सासरिं निघतां दाटतो गळा,
बागबगीचा, येथला मळा,
सोडितां कसें मन चरचरतें!

जीव मनींच्या मनीं तळमळे
वाटे बंधन करुनि मोकळें
पळत निघावें तुजजवळ पळें-
परि काय करूं? उरिं भरभरतें.

अता तूंच भयलाज हरी रे!
धीर देउनी ने नवरी रे
भरोत भरतिल नेत्र जरी रे!
कळ पळभर मात्र! खरें घर तें!