paroles de chanson Zimmer - Patent Ochsner

Wo mir früeh am morge si aacho
Hei mir üs es billigs zimmer gno
Wo me vom fänschter uus
De schiff hätt chönne winke
We me hätt wöue
D wänd hei blaui tapete gha
Mit guldgäube lilie & überem bett
Es bild vom garibaldi wonis zuegluegt het
& Nes chruzifix
Lisli het me d heizig ghöre surre
Oder tube wo vor em fänschter gurre
Mau e hung mau es näbuhorn
Schritte & schtimme vom gang här
Oder vo duss
Dr teppich isch rot gsi & het persisch ta
Dr chronlüchter wo ne waggu het gha
& Im egge e schtuehl, e tisch, druff e vase
Mit blueme us plastig
I gloube, das & dr bahnhof & süsch nid viu
Meh hei mir zwöi I dere wuche
Vo venedig gseh