paroles de chanson Vexilla Regis - The Sixteen feat. Harry Christophers

Vexilla Regis prodeunt:
Fulget Crucis mysterium:
Quo carne carnis conditor,
Suspensus est patibulo.

Quo vulneratus insuper,
Mucrone diro lanceae
Ut nos lavaret crimine,
Manavit unda sanguine.

Impleta sunt quae concinit
David fideli carmine,
Dicens: in nationibus
Regnavit a ligno Deus.

Arbor decora et fulgida,
Ornata Regis purpura,
Electa digno stipite,
Tam sancta membra tangere.

Beata cuius brachiis
Saecli pependit pretium,
Statera facta corporis,
Praedamque tulit tartari.

O Crux ave, spes unica,
Hoc Passionis tempore:
Auge piis iustitiam,
Reisque dona veniam.

Te summa Deus Trinitas,
Collaudet omnis spiritus:
Quos per Crucis mysterium,
Salvas rege per saecula.

Amen.