paroles de chanson Erinnerig a D'Grossmuetter - Tinu Heiniger

Die Melodie hie, das Lied hesch gsunge
Mit dyre fyne u dünne Stimm
U mir drei Giele hei när mitgsunge
Derzue hesch glismet, läbsch längschte nümm

Veruss isch fyschter u wyssi Blueme
Chläben ar Schibe, Blueme us Ysch
Jetz nimmsch dy Brülle, es Buech, e Cherze
Die zünidsch a, stellsch se ufe Tisch

U wenn i truurig bi
De chunnsch mer du z'Sinn
U wenn i truurig bi
Ghör i dy Stimm

U när verzellsch üs es gfürchigs Märli
U ds Tigerbüssi schlaft uf dym Schoss
Verusse schneits's u me ghört vo Wytem
E grosse Schlitte, d'Glöggli vom Ross

När geisch i d'Chuchi, holsch d'Wiehnachtsgüezi
Nei, sövu viel het's no gar nie gha
U wo di frage, warum's soviel hett
Seisch, we's der Schnee chunnt, de muess i ga!

U wenn i truurig bi
De chunnsch mer du z'Sinn
U wenn i truurig bi
Ghör i dy Stimm

U wenn i mängisch hie ganz allei bi
De wetti wüsse, wo du jetz bisch
Gsehsch ächt, dass d'Tanne u d'Böim hie stärbe
U gsehsch im Bach hie verrecke d'Fisch!

Gäu, we me tot isch, versteit me aues
Gäu, we me tot isch, isch's nid verby
Wo du bisch gstorbe, gäu, denn hesch Angscht gha
U jetz hesch nümm Angscht, wie isch's derthie?

U wenn i Angscht ha
De chunnsch mer du z'Sinn
U wenn i Angscht ha
Isch's nümm so schlimm