paroles de chanson 出境 - 曾瑋中

各位旅客恁好，感謝恁乘坐人生航空公司，前往後世人的班機。
咱誠緊就欲起飛啊，請縖好安全帶。
若有任何需要，請向服務人員反映來為恁服務，多謝。

所有祝福是我最後行李
所有恩怨到遮就暫時停止
踏上旅程難免淡薄仔傷悲
從今開始請將我囥佇心內面

其實我毋甘離開
離開我上愛的你
毋通閣傷心請你好好保重自己

其實我毋甘離開
離開上愛我的你
千萬著毋通袂記
愛平安快樂過日子

各位旅客，咱這馬佇咧回憶的頂頭，
恁會當看對窗仔外，
紲落來咱會經過恁過去的一生，包括恁的青春，
恁的光彩，猶閣有恁的遺憾。

越頭看過去偌濟話袂赴講出喙
欠誰的一句我愛你一句對不起
若是有一工咱佇夢中相見
請將我攬絚絚安慰我的掛意

嗚～我欲來離開
離開我上愛的你
毋甘你傷心愛有笑容敢有聽見

喔～我欲來離開
離開上愛我的你
望你著早日慣勢
無我陪身邊的日子

半夢半醒目睭沓沓褫開
頭殼敧敧這班機已經到位
喘一口氣欶著淡薄啊空虛
無人佇身邊只有面頂兩逝淚

各位旅客恁好，本班機已經到位啊，所有的一切到遮已經圓滿。
請毋通袂記得恁隨身的行李，
機長佇遮代表人生航空公司感謝恁的乘坐，
向望恁會當有一段全新、美滿的人生，多謝。