Текст песни Alag Hone Ki Rasm - Beybaar Prashant

Shaadi kee tamaam rasmein banaayin
Tamaam rivaaj tay kiye
Kaun kya karega, kaise hoga
Kise kithna denaa hai

Magar kyon na banaai
Alag hone kee rasm
Koyi rivaaj to banaaya hota
Koyi qaayada padhaayaa hota

Safed sindur kee rasm hee rakh dete
Jise pairon mein lagaaya jaataa

Jis chaturaai se hathakangan
Kee gaanthen kholi thim aur
Do dafaa anguthi jiti thi
Haldi ke paani mein tumne,
Usi chaturaai aur dam se
Kaatani hotee vahee anguthi

Kachi mehandi dhote hum tum
Aur saath usi ke dhone hote saat vachan

Vo saat janmon kee kasame, jo khaayin thim
Munh mein ungali daalkar
Nikaalani hotin baahar

Mangalsutra ke moti par aidi rakhkar
Kuchalakar
Binaa peechhe mude
Chale jaanaa hota
Ya lene hote ulte phere jal ke chaaron taraf
Aur kisi havankund mein shaadi album
Aur sambhaal kar rakhe card
Kee aahuti deni hotee

Sabhee parivaar jan
Haathon mein jaale hue chaaval lekar
Khadey hote, haath jodate
Pandit jor se kehtha,
"badhai ho, algaav sampann hua "

Kuch to rivaaj
Koyi to rasm banaai hotee
Kuch to mushkil hotee jaane mein

Jo is tarah muje chhodkar
Aasaani se chale gae tum
Likhakar faqat ek kaagaz par
"its note varking enemor"