Текст песни 'A sirena - Antonello Rondi

Quanno 'a luna, affacciannose 'a cielo,
Passa e luce e 'int'a ll'acqua se 'mmira
E ce stenne, d'argiento, 'nu velo,
Mentre 'o viento d' 'a sera suspira.
Quanno io sento, pe' 'st'aria addurosa,
Comm' 'a voce d' 'a terra luntana,
Lenta lenta, suna 'na campana,
'Ntenneruto, mme metto a vucà.

Tutte mme diceno:
"Pe' sotto Proceta,
Si passe, scanzate,
Ca c'è pericolo.
Ce sta 'na femmena
Ca 'ncanta ll'uommene.
S' 'e cchiamma e, a ll'urdemo,
Po' 'e ffa murì".

Ah! Voca, vo'!

Ma 'na Santa tengo io,
Ca mme prutegge e mme scanza p' 'a via,
Santa Lucia, Santa Lucia.

Voca, voca! 'A 'i' ccà Proceta nera,
Sott' 'o cielo sereno e stellato,
'A vi' ccà, 'mmiez'a 'st'aria d' 'a sera,
Tale e quale a 'nu monte affatato.
'A vi' ccà, che silenzio, che pace!
Ll'ora è chesta d' 'a bella sirena
Scenne, sciulia, s'abbia 'ncopp' 'a rena
E 'nu segno, cu 'a mano, mme fa.

'Na voce amabbele
Tremma pe' ll'aria:
"Scanzate, scanzate,
Ca staje 'npericolo.
Chest'è 'na femmena
Ca, sotto Proceta,
'Ncantate ll'uommene
Fa rummanè".

Ah! Voca, vo'!

Ma 'na Santa tengo io,
Ca mme prutegge e mme scanza p' 'a via,
Santa Lucia, Santa Lucia.

Voca, voca, 'a sirena mm'aspetta,
Mme fa segno e, cantanno, mme dice:
"Piscatò, vuò cagnà 'sta varchetta
Cu 'nu regno e 'na vita felice?"
Voca fore! 'Sta voce 'a cunosco.
Chi mme chiamma se chiamma Isabella.
Prucetana, sì 'nfama e sì bella
E mme stive facenno murì.

'Na voce amabbele
Tremma pe' ll'aria,
Ma è tutt'inutile,
Nun mme pò vencere.
Saccio a 'sta femmena
Ca, sotto Proceta,
'Ncantate ll'uommene
Fa rummanè.

Ah! Voca, vo'!

Ma 'na Santa tengo io,
Ca mme prutegge e mme scanza p' 'a via,
Santa Lucia, Santa Lucia.