Текст песни Neppes, Ihrefeld und Kreuzberg - BAP

Ihr kohmt uss Ankara un haad jedacht,
He wöör et wunderbar.
Haad jeträump vun unsrem Wohlstand,
Vum Jlöck un vun nem vollen Kühlschrank.
Vun Istanbul bess Köln Hauptbahnhof,
Mem Zoch, wobei üch ziemlich klaar woot,
Wie wigg et ess vun he bess dohin,
Wo Frau un Pänz jetz noh doheim sinn.
Su stund ihr do mem Pappkartönche,
Haad jedaach, ühr Zick, jetz köhm se.
Ussjerötscht op Chromattrappe,
Haad ihr jedaach: Jetz möht et klappe!
Neppes, Ihrefeld un Kreuzberg,
Castrop Rauxel, Ford un Bergwerk.
Türkeveedel, fass wie Harlem.
Müllabfuhr, un waade, waade
Merke, dat mer nit erwünsch ess
Un met nem Schnäuzer keine Minsch ess.
Drei Johr Etagenbett,
Sibbe Mann en ein klein Buud jequetsch.
De Strooß jefähsch, Akkord ahm Fließband
Un Övverstunde für paar mieh Mark.
Dat Jeld, wat üch dann övvrich blevv,
Dat haad ihr brav nohuss jescheck.
Frau un Pänz, die dääte waade
Op ene Breef: Kütt noh, ich waade!
Zwei Zimmer, Altbau, Klo ohm Flur,
Vierhundertfuffzich Märkcher nur.
Su ess et jetz, su weed et blieve.
Saat: Wooren dat die Wunschtraumziele?
Mer wooren do, en Ankara,
En Aydin un och en Tekirdag.
Do joov et Raki, Thy un Köfte,
Basars, Cafes un klein Jeschäfte.
Mer hann jespeelt für jroos un klein.
Mer hann jeschwaad met Ärm un Bein.
Mer hann jedanz, jerauch, jesoffe,
Mer hann die Männ doheim jetroffe.
Op eimohl säht dä Schmal: Verdamp,
Häss do dich och wie ich jeschamp?
Verjlich ens, wie die he zo uns sinn
Un wie mer die ze Kölle ahnsinn.