Текст песни Weisste Noch? - BAP

Dä kleine Jung do, met singer Labberledderbotz un dämm Facon-Schnitt, dä leider hinge vill ze koot
Met singem Frotteehemp, dä Nylonsocke un dämm Vüürkreechsrad
Ahn su 'nem Sommernommedaach vüürm Panorama singer hillije Stadt
Dä die Wajons zällt vun dä Jüterzöch op der Südbröck
Hätt off sing Rad jähn en dä Ring jeschmesse – drop, em Bremserhüsje weg.
Ah, weißte noch?
Ah, weißte noch?
Mann, he dat Photo, om Balkon vum Onkel Fritz
Em Sonndacahsahnzoch, luhr wie dä ärme Kääl do setz
Enjeklemp zwesche Kaffeedesch un singer huhtoupierte Tant
Vun der 'e nie begriffe hätt, wiesu jraad die nu jetz met ihm verwandt
Mir dunn noch hück de Uhre wieh, wenn ich draan denke ahn dä Pissverzäll
Die Non-Stop, Heuchel-Litanei un dat jekeifte Imponierjebell
Ah, weißte noch?
Ah, weißte noch?
Doch he: Martina!
Mensch, woor ich scharf op dich, bloß ich woor Luff für dich, häss einfach durchjeluhrt durch mich
Jetz, wo'sch dat Klassenphoto sinn, bild ich mir en, et rüsch sujar noh dir
Do rochs wie'n Mischung domohls zwesche Wrigley's Spearmint-Gum un 8 x 4
Met dingem lange blonde Zopp un dingem blaue Karo-Falderock
Woors do die Göttin vun der Zwirnerstrooß un övverhaup vum janze Block
Ah, weißte noch?
Weißte noch?
Oh, all dä Weihrauch he, ming Kommunionskääz en dä Hand
Der schönste Daach en dingem Lewe, hatten se jesaat
Doch, dat die Nummer he en Fint woor, hatt ich janz jefährlich em Urin
Un ussjerechnet ahn dämm wieße Sonndaach jing mer en Saach nimieh uss'em Sinn
Ein met Martina un met Jüterzöch un irjendjet met vill Jeföhl
Ein ohne jede Jarantie, met der mer stolz setz zweschen alle Stöhl
Ah, weißte noch?
Ah, weißte noch?
Ah, weißte noch?
Ah, weißte noch?