El Television

فتحت التليفزيون كالعادة نفس الكلام
الفن دمه تقيل زيه زي الإعلام
اللي عامل فنان واللي عامل مثقف
والجمهور كالعادة بيعمل زيطة ويصقف

بيعلموك إزاي تحب وتكره
بيزرعوا في نفوخك أي فكرة
والغسالة شغالة ليل نهار
تغسل عقول الناس وتلوث الأفكار

فتحت التليفزيون كالعادة نفس الكلام
الفن دمه تقيل زيه زي الإعلام
اللي عامل فنان واللي عامل مثقف
والجمهور كالعادة بيعمل زيطة ويصقف

التليفزيون هو اللي سايق
ياخدك بعيد ويجيبك ويخلي عقلك غايب
التليفزيون هو اللي سايق
ياخدك بعيد ويجيبك ويخلي عقلك غايب

ومذيع التوك شو بيهرج زي البلياتشو
مع الفنانة ذات الإحساس اللي بتحب كل الناس
هي هي نفس الحدوتة، طنط بتعمل دور بنوتة
نفس السيناريو نفس الحوار
مكتوب علينا غصب واقتدار
والأغاني مش عاجباني
ولا فيها كلام ولا فيها معاني
نفس الاسطمبة زي الأفلام والمسلسلات
صدر وورك ورقصة مزيكة مهرجانات

التليفزيون هو اللي سايق
ياخدك بعيد ويجيبك ويخلي عقلك غايب
التليفزيون هو اللي سايق
ياخدك بعيد ويجيبك ويخلي عقلك غايب

محلل إستراتيجى خارج من فيلم أكشن
ليل نهار علينا عمال بيكتشن
عايش في مغامرة كل حاجة مؤامرة
قال إيه ٢٥ مكانتش ثورة
والمذيع طبعًا شغال عصفورة
شغلته يلمع ويبروز الصورة
بيتاجروا بأي حاجة معدية
مرة بالدين ومرة بالحرية

التليفزيون هو اللي سايق
ياخدك بعيد ويجيبك ويخلي عقلك غايب
التليفزيون هو اللي سايق
ياخدك بعيد ويجيبك ويخلي عقلك غايب

والناس فى بعض عمالة بتقاطع
والجهل ع الشاشة ساطع
قفلوا البرنامج من قبل ما يبدأ
أصل الحقيقة بتوجع وبتحرق
النكتة كانت عجباهم إمبارح
بس النهاردة الوضع مش سامح
ولو كلامك منطقي أو ليه معنى
هيقولوا عليك عميل ومش تبعنا