Текст песни Matlob Zaeem - Cairokee

مطلوب زعيم
لشعب طول عمره عظيم
لشعب كان فاعل زمان لكنه هان
حتى إنه ثار
بإيدين كبار و إيدين صغار
مفعول بيه بيقسموه ويفرقوه
ويقطعوا فى عين اللى جابه واللى جاب أبوه
عشان يموت، أو ينتهى
مطلوب زعيم
لشعب حكامه خانوه
وتوهوه وغيبوه واللى انتبه منه وفاق
غموله عينه وكمموه
وسلموه فى المعتقل
لكلاب جعانة يقطعوه
لكنه رغم القهر قام زأر وزام
و في إسبوعين زلزل حصون الجلادين
هد النظام فوق راس جميع، المفسدين
مطلوب زعيم
يحمى الحقوق
يعدل ما بين الناس تمام زى الفاروق
ويكون حنين على الفقير
و على اللى فاسد يفترى
يهدم على دماغه الشقوق
ويعلقه فى المشنقة
أو يرفعه، على راس خازوق
مطلوب زعيم
ما يقولش علي الخواف حكيم
ويكون كمان سمعه سليم يسمع لنبضة قلبنا
ويكون مكانه فى وسطنا
ما يعيش أبدا فى القصور
والبعض منا -للأسف- ساكنين قبور
يشرب وياكل أكلنا
ويعيش كواحد مننا
يسمعلنا ويشور وياخد رأينا
وقت الخطر نتلم حواليه كلنا
ونضحى وياه بعمرنا
مطلوب زعيم
على المسئولية يكون أمين
ويكون جرئ ويكون شجاع
مش إمعة وحتة بتاع
يعرف يقول للظلم لأ
ويموت ولا يفرط فى حق
مطلوب زعيم
نقدر نحاسبه بالقانون
أو نعزله لو للأمانة يوم يخون
لا يشترط الشكل إيه
لا يشترط السن إيه
لا يشترط الملة إيه
شرطه الوحيد يكون بشر
بالإختصار، مطلوب دكر