Текст песни Om Al Mawjat - The Synaptik

Let's do it four by four
And then let's do some more

يا يا ياه أم الموجات (yeah listen)
خايف أرفع أيدي عنكم وتطلعو لغم
خايف أضلني ماسك فيكم وتطلعو طعم
خايف أضيع من حياتي كمان كمشات
بين الدراسة والراب لا هان ولا هناك
خايف أصحى يوم الاقي شخص عادي بالمراي
خايف يوم أبطل أحلم وأترك هالشغلة وراي
خايف ينسوا يهجروا يتركوني ويكبروا
وأنا أكبر وأهدافي شوي شوي يصغروا
خايف أوصل لـ اللي بدي أياه وأضل تعيس
خايف أطلع بالآخر واحد بعرفش يعيش
خايف يسحبوا الفيش وأصفي بلا وصله
كلهم يحبوا التقليد وأضلني لحالي الأصلي
خايف تفوز الظروف خايف تخون الحروف
خايف الحالة تلزمني أني الزم السكوت
خايف من الصعود، خايف من السقوط
خايف من مجهول وخايف من الجمود

جاييك بأم الموجات، لتشيل كل شي ونعيد من جديد
قارب معمول من أصوات يا بينقذني يا بغرق فيه
وهيلا، هيلا، هيلا
وأملنا معلق بالريح

أكبر الحروب هي الي بنخوضها بالصمت
الإكتئاب بوكل فينا شوي شوي والضغط
قاعد على الصدر وبيدفشنا لنتطرف
فماد أيدي الكم مع بعض نقدر نتصرف
لنواجه كل الزفت ونطلع بأقل ضرر
رجعوا يوسف لأبوه بلكي يرجع فينا بصر
نترك أثر حتى لو صدى غصبٍ عنهم كلهم
وإذا أكل حديد صدأ بضل الموج يقلهم
غصبٍ عنكم الدم الجديد رح يورث الأرض
والموج رح يمسح معالم بطشكم
ويضل الغُنا وحب الحياة فوق القبور الغرقانة
وأثر الموج رح يغسل كل الأرواح التعبانة
ونرجع على الشط نضاف، ننسى كيف نكره. ننسى كيف نخاف

جاييك بأم الموجات، لتشيل كل شي ونعيد من جديد
قارب معمول من أصوات يا بينقذني يا بغرق فيه
وهيلا، هيلا، هيلا
وأملنا معلق بالريح

جاييك بأم الموجات، لتشيل كل شي ونعيد من جديد
قارب معمول من أصوات يا بينقذني يا بغرق فيه
وهيلا، هيلا، هيلا
أملنا معلق بالريح