Lyrics Brief - Tinu Heiniger

Sit di Brief isch cho, isch aues, aues angersch
Sit di Brief isch cho, isch nüt meh so, wie's mau isch gsy
Sit di Brief isch cho, isch aues, aues angersch
Sit di Brief isch cho, dänken i nume no a di

Ds aute Steihuus isch vergheit
Der Spicher zbode, d'Schüür verbrönnt
U niemer weiss, wo's düregeit
I blase i mis Horn, no nie het's däwäg tönt

U I blase ds Horn, so lut, wie's geit
S'tönt schreg, s'tönt fausch, s'tönt ärdeschön
Was i ha ta u gseit, nüt tuet mir leid
I blase d'Seel mir usem Lyb mit dene Tön

U i schnuufe töif, tue d'Ouge zue
U tue se uuf, u gseh vor mir dis Gsicht
S'tuet guet, was gschribe hesch, jetz chumm, los u lue
So schreg, so schön, wie hie die Tön, isch üsi Gschicht

Sit di Brief isch cho, isch aues, aues angersch
Sit di Brief isch cho, isch nüt meh so, wie's mau isch gsy
Sit di Brief isch cho, isch aues, aues angersch
Sit di Brief isch cho, dänken i nume no a di

Im Chäller ligt e tote Hund
Begrabe, dä lochen mir jetz uus
Du luegsch, was ungrem rote Teppich vürechunnt
Es stinkt ir guete Stube vo däm noble Huus

U was mau isch gsy, wie alls isch cho
I muess dir's säge, wüll i gar nümm angersch cha
Du stuunisch, tobisch, grännisch, lachisch, gäu, du weisch es o
Me cha nit alls erkläre, cha nit alls verstah

Sit di Brief isch cho, isch aues, aues angersch
Sit di Brief isch cho, isch nüt meh so, wie's mau isch gsy
Sit di Brief isch cho, isch aues, aues angersch
Sit di Brief isch cho, dänken i nume no a di