Lyrics Briäf a Misäuber (Liebe 1) - Tommy Vercetti

Liebe Simon hiä isch Winter,
Schneestärnä adä Fänster,
Chauti Händ, toti Gsichter,
Ig ha a di müessä dänkä.
Ig weiss dr Frühelig isch bezoubernd,
Schmetterlingä, Änglä singä, äng umschlungä du und si, ohni Gwunder,
S'schiint es längt für immer.
Doch aues änderet, nüt blibbt,
Ds darf di nid erschreckä.
S'isch jedä Morgä öpper nöis,
Chasch sä immer nöi entdeckä.
D'Wäut schnuufet, du muesch mitgah.
Nume Puls versteit d'Liebi.
Philosophie wird nid grösser, aus dini Mam wenn si di wieget.
Si säge di Zitä si verbi und verstecke d'Truur i ihrnä Ougä.
Schribä d'Liebi isch da und widmä z'Buech arä Frou.
Gloub nid ar Illusion, du heigsch unändlech Müglechkeite.
Wüu chli chattä isch okei, eis ga trinkä, villech eh Nacht doch us füfhundert wird schnäu null wenns drum geit näb ihrä z'schlafä, drum geit mit ihre z'grännä, mit ihrä z'läbä, mit ihrä Chind z'ha.
Wenn si würklech guet schmöckt wirsch du aus i ihrä findä.
Liebi isch ke Supermarkt.
Du findsch kes Produkt nach Mass,
Mit Garantie für Wahnsinns-Sex, Harmonie und luuter Spass.
Liebi isch ke Wüsseschaft, Glück kennt kes Schlüssuloch.
Subjekt si bedütet irä Wäut vo Objekt läbä.
U plötzlech isch si ä Mönsch, Happy-End verbi,
Fium geit witer.
Us vergöttere wird Ihversucht, us interessant si wird strittä.
Doch das isch aues paradox, lah di nid la iritiere.
Isch eh Liebi womä nid trout würklech wärt z'kontrolliere?
U mängisch möchtschere iz Gsicht schlah.
Dr Hass chochet tief, nimms aus Zeiche wi fest du liebsch.
Wärs anders wärs dr glich.
Wär si anders wärsch nid hie.
Aso schnuff tief und küss sä.
Villech begrifsch de ei Sekunde, was Jesus scho immer gwüsst het.
Chunnsch du nach entsteit Ribig - mir si üs ds nümmä gwöhnt.
Wüu dr PC het ä Off-Chnopf, Fernseh flimeret so schön.
Aus isch müglech, aues iz.
Ganzi Wünsch ...
Klar hautet ke Beziehig länger aus zwöi drü Jahr bi au däm Shit.
Z'Läbä ä Bitch und du wirsch äuter, nüt stimmt wome dir verzeut het.
De wärs doch schön wenn si no hie wär und dir seit ds ihre Heud bisch.
Wüu Liebi isch viu schaffä, isch akzeptiere, isch entscheidä.
Was mit Geld nid chasch zahle isch bim stärbe nid allei si.
Wille isch romantisch ihres Schicksau.
Geduld meh Lideschaft aus Hass.
Und ig wott meh für si machä - schöner aus ig bi für si gmacht.
Und ig weiss mängisch luegsch i Spiegu, uf ds Schwarzä vor Pupiue.
Suechend nachmä Glas vou Wiuue, wüu üs dr Hauter nüm cha Hiuf gä.
Mir si hützutag nüm fähig, isch chli eh z'gmüetlechi Erklärig.
E Umarmig isch ou aues wenn e berüehmte Millionär bisch.
Und frag nid ob d'Müeh a Wärt isch.
Wenn ds wüsstisch wärsch du Gott.
Und de wärs ja ou ke Müeh - zudäm ds Gott se niemeh wott.
Und unuswichlech wirsch abhängig.
Doch gägäsitig isches gsund.
Geits um Freiheit vo Materiellem blib e Rebell...
Und di Stouz wird viu verletzt, dänksch ds Läbä wär behindert.
Wo doch z'Läbä nur dr Sinn het paar Behinderige z'finge.
Öpper wo ds umerennä linderet - mit dir Problem und mit dir Ching het.
Ufem Stärbäbett isch Karriere sicher nüt wod wosch erinnere.
U dr Winter chunnt bestimmt - bitte eifach nüt verwächsle.
Nid d'Tecki mitem Schnee, nid d'Heizig mitem Wätter.
Jede Kuss mau isch me wäg - ds au dä Überschwang vo hüt.
Ä autä Ma seit e Stei sig am Sisifus sis Glück.
Ig weiss nid viu, weiss villech nüt.
Ha ke Plan nume ds Gfüu ds, im Winter gsehsch klarer aus im Früehlig.
Bis gly.

Rechte bei Tommy Vercetti