Lyrics 新光棍姻緣 - 尹光 , 胡美儀

擔番口大雪茄咋 充生晒認係經理
撈世界就要醒目 我一於當玩把戲咋

著起西裝革履 USA 歐西美
喂喂我實在無乜聲氣架 完全係靠滾
我全憑係棍番嚟
剛啱有隻大鷓鴣 嘩肥就確係肥
佢今晚仲約咗我去睇大戲

(鄙人尹光 講起我就衰
乜都唔曉做 但係我有樣嘢叻 我識得滾
哼哼 今次就畀我滾到一個靚女 佢叫做露絲喎哈哈哈
犀利囉 打開個荷包 張張都係金牛喎
今晚仲約咗我嚟睇大戲
好等我落足嘴頭 釣返條大魚至得)

老襯何妨要多撳 我都好少理嘞
猛拋啲生藕 係都要攞便宜
近日有隻肥羊 佢話住響跑馬地喎
佢話佢響銀行 自己揸大旗

(我個名叫做Lucy呀 為咗養阿媽就逼住出嚟搵食啦
又好彩今日畀我撞到銀行大班經理喎
仲約我今晚睇大戲添呀
哈唔知嚟咗未呢)

(哈囉Lucy)

(Hi 光哥)

(嘩乜你咁耐先嚟架 等到我頸又長腳都痺咯)

(咁要扮靚啲先嚟見得你架嘛
點唧 我著件衫靚唔靚唧)

(嘩 唔淨止話件衫靚 你條腰仲靚呀)

嘩你擰柳腰好似蘇菲亞羅蘭
又似嗰個寶烈吉妲
佛見到都會起大痰 啲花靚仔想到心爛

嫩坑中坑都無限 No money都一概斬纜

我係大闊佬 派架雪佛蘭
袋美金起碼幾萬
講到伴女仔 好似加利格蘭 心郁郁想錫一啖

慢慢吖 先生
我梗會辦 飲杯先啦 兼吔餐飯

(睇完戲食飯都未遲 呢套戲好好睇架
你睇幾逼人 等我買飛嘞)

(唉 等我買啦)

(等我啦 你張張金牛 人地無得贖架 我有廿蚊散紙吖嘛)

(噢 我識人呀 你畀廿蚊我等我買啦)

(好 好呀好呀)

(咁你等我囉噃)

(咁你快啲返嚟嘞喎)

(我梗返嚟 唔駛慌嘞你)
(拜拜)

(拜拜)

(嘩去成個幾兩個鐘都未返嚟嘅 唔通光棍遇着無皮柴
慘嘞 我嗰廿皮 唉幾大都搵佢返嚟至得)
(喂 仲唔搵到你 哈)

唏原來大棍騙 真激氣 我差啲就比你氣死

無謂亂碰我 真好笑嘞 我根本不識你噃

你想棍騙老千哥 膽包天不怕死咩

如若亂碰我 我高聲嗌架 你嗰陣就一身蟻嘞

(你夠膽嗌我打你架)

(哎吔咩唔敢呀非禮呀 非禮呀)

(你唔好嗌 怕你啦)

喂唔好嗌啦 唔好嗌
啲錢都比你滾清曬咯
嗰廿皮係我嘅擋箭牌 碰啱你個無皮柴
我就寧願將肚餓捱 時時把萬壽拜

無皮柴遇老千真氣壞
真啱晒咯我哋天生一對

喂點解 你為何要扮企街唧

梗有理由 我為慈母逼要捱

唉我家陣個肚難捱

我帶你回去醫個肚皮

(係唔係呀)
咁就完全通晒咯

你真係良心不欺 良心不欺
行家真呀真知己

我又何必相欺啫 何必相欺
行家總要通氣

撞得真正嘥心機

棍騙本來係犯法事

係呀 一於回頭不幹 我哋結知己啦

願大家結好知己

莫非你對我有真情義

我哋同諧鴛侶 你同我畫眼眉

(好呀)

一於同諧鴛侶 相愛不相欺