paroles de chanson Nasadiya Sukta (From Rigveda) - Rattan Mohan Sharma

Nasadiya Suktam
नास॑दासी॒न्नो सदा॑सीत्त॒दानी॒म् नासी॒द्रजो॒ नो व्यो॑मा प॒रो यत्।
किमाव॑रीव॒: कुह॒ कस्य॒ शर्म॒न्नंभ॒: किमा॑सी॒द्गह॑नं गभी॒रम्॥१॥
nāsa'dāsī̱nno sadā'sītta̱dānī̱m nāsī̱drajo̱ no vyo'mā pa̱ro yat |
kimāva'rīva̱ḥ kuha̱ kasya̱ śarma̱nnaṁbha̱ḥ kimā'sī̱dgaha'naṁ gabhī̱ram ||1||
न मृ॒त्युरा॑सीद॒मृतं॒ न तर्हि॒ न रात्र्या॒ अह्न॑ आसीत्प्रके॒तः।
आनी॑दवा॒तं स्व॒धया॒ तदेकं॒ तस्मा॑द्धा॒न्यन्न प॒रः किञ्च॒नास॑॥२॥
na mṛ̱tyurā'sīda̱mṛta̱ṁ na tarhi̱ na rātryā̱ ahna' āasītprake̱taḥ |
ānī'davā̱taṁ sva̱dhayā̱ tadekaṁ̱ tasmā'ddhā̱nyanna pa̱raḥ kiñca̱nāsa' ||2||
तम॑ आसी॒त्तम॑सा गू॒ळ्हमग्रे॑ऽप्रके॒तं स॑लि॒लं सर्व॑मा इ॒दं।
तु॒च्छ्येना॒भ्वपि॑हितं॒ यदासी॒त्तप॑स॒स्तन्म॑हि॒ना जा॑य॒तैकं॑॥ ३॥
tama' āasī̱ttama'sā gū̱ḻhamagre"prake̱taṁ sa'li̱laṁ sarva'mā i̱daṁ |
tu̱cchyenā̱bhvapi'hitaṁ̱ yadāsī̱ttapa'sa̱stanma'hi̱nā jā'ya̱taika'ṁ || 3 ||
काम॒स्तदग्रे॒ सम॑वर्त॒ताधि॒ मन॑सो॒ रेत॑: प्रथ॒मं यदासी॑त्।
स॒तो बन्धु॒मस॑ति॒ निर॑विन्दन् हृ॒दि प्र॒तीष्या॑ क॒वयो॑ मनी॒षा॥४॥
kāma̱stadagre̱ sama'varta̱tādhi̱ mana'so̱ reta'ḥ pratha̱maṁ yadāsī't |
sa̱to bandhu̱masa'ti̱ nira'vindan hṛ̱di pra̱tīṣyā' ka̱vayo' manī̱ṣā ||4||
ति॒र॒श्चीनो॒ वित॑तो र॒श्मिरे॑षाम॒धः स्वि॑दा॒सी ३ दु॒परि॑ स्विदासी ३ त्।
रे॒तो॒धा आ॑सन्महि॒मान॑ आसन्त्स्व॒धा आ॒वस्ता॒त्प्रय॑तिः प॒रस्ता॑त्॥५॥
ti̱ra̱ścīno̱ vita'to ra̱śmire'ṣāma̱dhaḥ svi'dā̱sī 3 du̱pari' svidāsī 3 t |
re̱to̱dhā āa'sanmahi̱māna' āasantsva̱dhā ā̱vastā̱tpraya'tiḥ pa̱rastā't ||5||
को अ॒द्धा वे॑द॒ क इ॒ह प्र वो॑च॒त्कुत॒ आजा॑ता॒ कुत॑ इ॒यं विसृ॑ष्टिः।
अ॒र्वाग्दे॒वा अ॒स्य वि॒सर्ज॑ने॒नाथा॒ को वे॑द॒ यत॑ आब॒भूव॑॥६॥
ko a̱ddhā ve'da̱ ka i̱ha pra vo'ca̱tkuta̱ āajā'tā̱ kuta' i̱yaṁ visṛ'ṣṭiḥ |
a̱rvāgde̱vā a̱sya vi̱sarja'ne̱nāthā̱ ko ve'da̱ yata' āaba̱bhūva' ||6 ||
इ॒यं विसृ॑ष्टि॒र्यत॑ आब॒भूव॒ यदि॑ वा द॒धे यदि॑ वा॒ न।
यो अ॒स्याध्य॑क्षः पर॒मे व्यो॑म॒न्त्सो अ॒ङ्ग वे॑द॒ यदि॑ वा॒ न वेद॑॥ ७॥
i̱yaṁ visṛ'ṣṭi̱ryata' āaba̱bhūva̱ yadi' vā da̱dhe yadi' vā̱ na |
yo a̱syādhya'kṣaḥ para̱me vyo'ma̱ntso a̱ṅga ve'da̱ yadi' vā̱ na veda' || 7 ||