paroles de chanson Lied vom Waud - Tinu Heiniger

Mit de Chlage
Mit de Frage
Wo mi hie sit Tage plage
Won i mit mir umetrage
Gahn i jetz i Waud
Gahn i jetz i Waud

Dert verzeuen i de Böim
Myner Sorge, myner Tröim
Lose d Stiui u ir Rue
Ghör i ds Chlopfe vom ne Spächt
Däm los i zue

U i lose, lose, schwyge
La, was chunnt, la cho, la lige
Lose, luege, ghöre, gseh
Was hie um mi ume tönt
Nume das, nid meh

Im Wäg vor mir ufzmau es Reh
Es blybt stah, es het mi gseh
U jetz es zwöits, grad näbedraa
Mir stöh u stöh u luege
Luege lang enanger aa

Der Waud tuet guet, wott nümme hei
Hie im Waud bin i dahei
U mys Tau hie lüüchtet wyt u breit
We sich ds Mondliecht
Über ds Tau y leit

Mit de Chlage
Mit de Frage
Wo mi hie sit Tage plage
Won i mit mir umetrage
Stahn i hie im Waud
Stahn i hie im Waud

Wär kennt der Fuchs u syner Wäge?
I ha ne gschmöckt, i bi se glüffe, ou im Räge
I gah o denn i Waud, we niemer geit
Gah zmitts ir Nacht, gah dür e Näbu
Gah, wes chuttet u wes schneit

I stogle, stapfe dür e Schnee
U luege d Spur vom Fuchs, vom Dachs, vom Reh
Hie eini vom ne Has, u höch ob mir
Jetz d Chräie, wo mir rüefe, chräie
D Chräie, myner liebschte Tier

U hie näb mir es Schnäggehuus
U dert im Schnee e toti Muus
I gseh wis chunnt, wis stirbt, vergheit
Gseh d Sunne, wi si achegeit
Wi d Wäut sich drääit, der Tag vergeit

U lue, der Aabestärn geit uuf
I gah nomau der Waud zdüruuf
Hie obe ligt er, ganz allei
Är ligt mängs tuusig Jahr scho hie
Dä schön, dä schwarz, dä steiaut Stei

Myner Chlage
Myner Frage
Wo mi hie sit Tage plage
Won i mit mir umetrage
Legen i hie uf dä Stei im Waud
Legen i hie uf dä Stei im Waud

I schnuufe uus, i schnuufe y
I schnuufe, däiche nüt derby
Wär däicht scho dra, es wär mit üs scho gly
Mit Schnuufe u mit Läbe
Ohni Luft vom Waud verby?

Der Waud isch schön, der Waud isch gross
Böim, Tanne, Tier u Piuze, Farn u Moos
U Rue u Fride bruucht die Wäut
U Lüt, wo luege zu däm Waud
So, wie der Buur zum Heimet luegt, zum Fäud