Lyrics Yar - Elvin Nasir

Bitdi ömrüm, çıxdı canım çıxmadı yardan səda
Aləmə saldım səda, gəlməzmi dildardan səda?

Mən içimdən ağlaram səssiz, demiyin arsız mənə
Rəsmidir qar yağsa çıxmaz bircə an dardan səda

Boş yerə ah etmirəm mən, bir səbəb var ahimə
Ta ki, mizrab dəyməsə, çıxmaz yəqin tardan səda

Dağıdın göy üzündə hər nə qədər bulud varsa
Dedilər yar gələcək dedilər yar gələcək
Yazmasın bir gecəlik qələm kədər şeirlərini
Bir ümid var gələcək, dedilər yar gələcək
Nə yaxşı qonaq gəlmişəm işıqlı bu röyaya?
Elə bil günəş gülümsəyir asimanda aya
Nə qədər səsim çıxsa qışqıracam bu dünyaya
Çəkəcəm car gələcək, dedilər yar gələcək

Gözlərim diqqət ilə izləyir hər bir saatı
O gəlsə bircə dəfə donduraram kainatı
Gəlir ki yenidən qursun talan olmuş həyatı
Mənə memar gələcək,dedilər yar gələcək

Ürəyim yerindən çıxır daha tək vurmayacaq
Qaranlıq olmayacaq, zülmət olmayacaq
Ruhuma deyin artıq soyuqlarda donmayacaq
Günəş, bahar gələcək, dedilər yar gələcək

Oturub gözləyirəm başqa da yoxdur əlacım
Bir odur ruha qida, bir odur ehtiyyacım
Heç zaman meyvə verməyən mənim ol eşq ağacım
Verəcək bar gələcək, dedilər yar gələcək

Dağıdın göy üzündə hər nə qədər bulud varsa
Dedilər yar gələcək dedilər yar gələcək
Yazmasın bir gecəlik qələm kədər şeirlərini
Bir ümid var gələcək, dedilər yar gələcək

Dünyanın halı yaman səmada ulduz olmasa
Yaralar sızıldamaz ki üstündə duz olmasa
Dedilər gələrdi çoxdan yolları buz olmasa
Əriyib qar gələcək, dedilər yar gələcək

Əllərim əsir sevincdən, gözlər yenə ağlar
Qollarım həsrətindədir ki gəlsə tez qucağlar
Keçəcək neçə yollar, neçə səhra, neçə dağlar
Gəzib diyar gələcək, dedilər yar gələcək

Əsməsin külək, dəniz dalğalanmasın bu gecə
Görəsən hansı tərəfdən gələcəkdir gizlicə?
Görəsən saçlarının, gözlərinin hali necə?
Necə didar gələcək, dedilər yar gələcək

Baharda günəşmi var, qışında qarınmı var?
Niyə ağladın gözüm, dərdin ahu zarınmı var?
Sən kimi gözləyirsən, şair sənin yarınmı var?
O qatar gəlməyəcək, daha yar gəlməyəcək
Kim dedi yar gələcək, sən haradan eşitdin ki?
Nə günəş çıxmayacaq, nə bahar gəlməyəcək
Sən götür bircə qələm dərdini yağdır vərəqə
De ki yar gəlməyəcək, daha yar gəlməyəcək!