Lyrics Jede Chunnt U Jede Geit - Tinu Heiniger

Mängisch hani hie vo auem gnue
La der Lade ache u tue zue
Ha eifach der Läckmer hie und da
Aues, aues schysst mi a

Mängisch bschliessen i mi y
Wett am liebschte gar niene meh sy
U när däichi mängisch dra
Wenn i nume chönnti ga

Aber nächär fahrt's mer aube y
Plötzlech wäri aus verby
"Haut, he, wart - bi no nid zwäg!
Du dert! Tue die Sichle wäg!"

Jede chunnt u jede geit
Kene isch für z ga bereit
Irgendwenn chunnt jede dra
D Zyt isch gäng o d Zyt zum Ga

Aus, was ufrächt, schön u stouz
Hie us Yse, Stei u Holz
Schynbar ewig, ewig steit
Aus wird rostig, fuul u vergheit!

Jedes Schloss hie, bout us Luft
Jede Priester, jede Schuft
Jede Chünig, jede Cloon
Jede uf sim höche Thron

Jedes Ching u jede Greis
Dä wo nüt, ou dä, wo aues weiss
Aus u jede steit, blüeit u vergeit
Ds Läbe isch Vergänglechkeit

Jede chunnt u jede geit
Kene isch für z ga bereit
Irgendwenn chunnt jede dra
D Zyt isch gäng o d Zyt zum Ga

Eis Tags geits mit dir z'Änd
Lue, still liege diner Händ
Uf der Dechi. Los, ganz lys vo wyt
Lütte d Glogge - es isch Zyt

Plötzläch blibt der Ate sta
Du lasch los, ja, lasch la ga
Nomau Panik, Angscht - verby
Du geisch use, irgendnöime hi

Eifach use, irgendwohäre, gäu
Irgendwenn würds irgendwo när häu
D Schmärze, d Angscht, di Wuet, aus liessisch da
O di Wunsch, mau däwä chönne z'ga

Jede chunnt u jede geit
Kene isch für z'ga bereit
Irgendwenn chunnt jede dra
D Zyt isch gäng o d Zyt zum Ga

Jede chunnt u jede geit
Kene isch für z'ga bereit
S geit ums Sy, s geit nid ums Ha
Nid ums Feschtha und ds Laga