Lyrics Lied Für Ds Theater 1230 - Tinu Heiniger

Lied für ä Pesche Schneider u für ds Theater 1230

S'isch Abe, nass u chaut ir Stadt
Du hesch Fürabe gha
Loufsch müed, missmuetig ds Rohr zdürab
Wasch no es Bier ga ha

Da! Plötzlich steit vor dir e Frau
Zucksch zäme u blybsch stah
Us fyscht're Löcher luege di
Zwöi Chatzenouge a

U ds grosse, rote Mu im wysse
Gsicht seit "Du, blyb da!"
När fahrt sie dir ganz fyn dür ds Haar
"Chumm mit! Du! Schöne Ma!"

"Chumm mit! Los! D'Musig spielt für Di!
Los! Kennsch das aute Lied?
Uns're beiden Schatten ...he!
Was isch? Was hesch? Bisch müed?

Bisch müed vom Läbe? Läbesmüed?
Hesch chaut? - Eh ja, das gits
Chumm nächer, chumm ganz nach zu mir
Hesch warm so? Gspürsch di jetz?"

E längi Stäge geisch mit
Dere schöne Frau zdürab
Hocksch ab u schnallsch di a, "s'faht a!"
U jetze, jetz schnallsch ab!

U du weisch nümme
Wär de bisch
Wo d'bisch
Was isch
U was isch gsy!
Vergissisch au die Angscht
U au dä Schmärz
U wie die spiele
Singe, tanze
Läbe dert
Das fahrt dir y!
U preicht di zmitts i Buch
U zmitts i ds Härz!
U preicht di zmitts i ds Härz!

U d'Zyt u ds Stück gö schnäll verby
U jetz hocksch ganz aley
Dert uf dim Stuehl -du rüefsch
"Was isch? Syt dir jetz all scho hei!"

Ke Antwort, still, o gseh tuesch nüt
Jetz wird dir angscht u bang
Haut! lue! Im Egge hinger, dert!
Dert lüchtets: "Notusgang"

So, use, nume use jetz
Du möögisch "s'längt, ha gnue!"
U wo d'bir Tür bisch seit e Stimm
"Dr Notusgang isch zue!

U i bi dä, wo vori grad
Im Stück der Tod het gspielt
Häb doch nid Angscht, du weisch doch, i
Bi dä, wo hie befiehlt!"

Voor git es Liecht, u gottseidank
Die schöni Frau steit da
"Sälü! Mir spiele jetz nomau
Dys Stück, psst Rueh, s'faht a!"

Tatsächlech! Nomau ds glyche Stück!
"Was söu das? Hallo! He!
Chöit höre! Ja I Dir spielet guet
Das hani aus scho gseh!"

"Schwyg jetz! U lueg dir's nomau a!"
Seyt jetz der Tod näb' dir
"Lue, jede, wo hie spielt, versteisch
Isch ou e Bitz vo dir!"

U du weisch mümme
Wär de bisch
Wo d'bisch
Was isch
U was isch gsy!
Vergissisch au die Angscht
U au dä Schmärz!
U was die spiele
Singe, tanze
Läbe dert
Dis Läbe fahrt dir y!
U preicht di zmitts i Buch
U zmitts i ds Härz!
U preicht di zmitts i ds Härz!

U du weisch mümme
Wär de bisch
Wo d'bisch
Was isch
U was isch gsy!
Vergissisch au die Angscht
U au dä Schmärz!
U was die spiele
Singe, tanze
Läbe dert
Dis Läbe fahrt dir y!
U preicht di zmitts i Buch
U zmitts i ds Härz!
U preicht di zmitts i ds Härz!