paroles de chanson Lo sciamano - Davide Van De Sfroos

E quaand te imparet a vèss lüserta el Sàss el sarà püssee gross ancamò
E quaand che'l ragn el tira la tela sia l'acqua che'l suu la faran brilà
Varda trii rundin che gülen a roeda s'cèpen giù la nigula de mila muschitt
L'è una lama de lüs rifletuda quela dell'unda che solta in söe l'oecc

E quaand te imparet a vèss el cavèden te imparereet a vardà in soel fuund
El puunt el se bagna se l'acqua la dunda e la breva mata la passa a sügà
Omen o dona cun't el sogn faa de paja varda cun ti ii oecc ma impara a saràll
Impara la danza de la margherita impara a cürvass senza s'cepàss

Briisa de Néss, erba de Buffalöra, sabbia de Fuentes e un trönn de Culmenàcch.
Güla, güla... güla fina a Tresenda, gula sö in Valcavargna e al Pian del Tivàn

Anej faa de fèrr che penden giù del mür el Re de ogni umbria ii a dupéra ancamò
Che lìga la barca cun deent la fuschiia e sgraffigna el cipress cun l'ungia a zig zag
Lìga un tòcch della trezza rubàda ai cavèj de ogni alba e ai cavèj de ogni aurora
L'è bon de desfà el garbii del gumitul che te gh'eet in del ventru quand riva la nocc

E quaand te imparet a vèss el merlu e a disegnà cun't el becch in del praa
Te truvereet l temp e l bersaglio cun la zampa che sgàrla e cun l'ala che la và
E scülta l cancell de la darsena antiiga che'l canta cun l'acqua che bagna i soo gaamb
E l'unda la rüzza e la pica la lengua ma la darsena la sa che po mea majà el laagh

Briisa de Néss, erba de Buffalöra, sabbia de Fuentes e un trönn de Culmenàcch.
Güla, güla... güla fina a Tresenda, gula sö in Valcavargna e al Pian del Tivàn

E quaand che vedareet un fantasma de foeja de urtiiga de ruggin e melma
Impara el suspiir tra la riva e la prona impara el disegn ne la ruga del sass
Troeva la pioema che ha perdü la pujana perchè gh'è deent el saangh del tramunt
El suu lassa in giir penej incendiaat ma cun questa pioema tii podet smurzà

E quannd te imparet a vèss pipistrell a gulà senza schema e cürvà senza cürva
Te pruvereet el tragitto impussibil del viagg che te feet senza moev gnanca un pàss
Cun't i aal incrusaa in soel disco de loena tra i ramm dii uliiv e'l glicin che dunda
Pruvereet finalment quela sbrunza che proeven i foej nel fiasch de ogni veent

Briisa de Néss, erba de Buffalöra, sabbia de Fuentes e un trönn de Culmenàcch.
Güla, güla... güla fina a Tresenda, gula sö in Valcavargna e al Pian del Tivàn