Текст песни Dur Qaçaq, Oğlum - Mirzə Babayev

Vah, bu imiş dərsi-üsuli-cədid?
Yox, yox, oğul, məktəbi-üsyandır bu
Molla deyil bundakı təlim edən
Əlhəzər et, bir yeni şeytandır bu

Dur qaçaq, oğlum, baş-ayaq qandır bu
Elm adına bir quru böhtandır bu
Dur qaçaq, oğlum, baş-ayaq qandır bu
Elm adına bir quru böhtandır bu

Gör, necə alt-üst eləyib şeyləri
Döndərib "a, b"-ə "əlif-bey"-ləri
Bidətə bax "ya" oxudur "ey"-ləri
Sanki hürufat ilə düşmandır bu

Dur qaçaq, oğlum, baş-ayaq qandır bu
Kafirə bax, gör, nə bədimandır bu
Dur qaçaq, oğlum, baş-ayaq qandır bu
Kafirə bax, gör, nə bədimandır bu

Diqqət edib baxsan əgər dərsinə
Hər sözü təlim eləyir tərsinə
Dəyməz о bir paslı dəmir ərsinə
Min də desə dürci-zərəfşandır bu

Dur qaçaq, oğlum, baş-ayaq qandır bu
Elm adına bir quru böhtandır bu
Dur qaçaq, oğlum, baş-ayaq qandır bu
Elm adına bir quru böhtandır bu

Bir də görürsən ki, olub heyvərə
Əlli uşaq banladı birdən-birə
Dərs deməsən, gülməli bir məsxərə
Molla demə, məsxərəcünbandır bu

Dur qaçaq, oğlum, baş-ayaq qandır bu
Kafirə bax, gör, nə bədimandır bu
Dur qaçaq, oğlum, baş-ayaq qandır bu
Kafirə bax, gör, nə bədimandır bu

Bundan əzəl böylə deyildi səyaq
Dərs oxudan mollada vardı ləyaq
Molla qoyardı başına şiş papaq
Öylə ki, bir fazili-dövrandır bu

Dur qaçaq, oğlum, baş-ayaq qandır bu
Elm adına bir quru böhtandır bu
Dur qaçaq, oğlum, baş-ayaq qandır bu
Elm adına bir quru böhtandır bu

İndi bütün iş dolanıb lağlağa
Dərs oxudur hər başı fəsli çağa
Etdiyi tədrisi ilan-qurbağa
Dərs deyil, hərzəvü hədyandır bu

Dur qaçaq, oğlum, baş-ayaq qandır bu
Kafirə bax, gör, nə bədimandır bu
Dur qaçaq, oğlum, baş-ayaq qandır bu
Kafirə bax, gör, nə bədimandır bu