Текст песни Mys Dorf, mini Wäut - Tinu Heiniger

I mym Troum stahn i höch ob mym Dorf
S isch mys Dorf u mys Tau, vo dert chum i här
I gseh wyt, wyt unger das Schrynerhuus
U I gseh o, was vordruffe steit: P. Heiniger-Schär

Der P. isch my Vatter, der Heiniger Poul
U wo dass Gott hocket, das weiss numen är
U der Vatter vor Mueter weiss o, wo der Herrgott isch
U das Huus ghört em Herr u em Gott u em Grossvatter Schär

U gross u läng u breit ligt vordrann d Hösumatte
Si lüüchtet grüen u häu, u Gott sei Dank, si isch no läär
U dert im Park steit schön u stouz di grossi Villa Reichen
U o der mächtig Löie steit no gäng, eso wi denn, s isch lang, lang här

Du mys Dorf im Ämmitau
I weiss no gnau wie d mau bisch gsy
U i vergisse nie, was du mir alls hesch ggä
U niemer cha mirs näh
Was du mir alls hesch ggä
U niemer, niemer cha mirs näh

Dert i däm Dorf, dert han i gschuttet, turnet, gschlööflet
U ha mit Fründe zäme dert my Jazz u myner Lieder gspilt
U i ha dert myner Helde verehrt, u so mängs vo ne glehrt
U när, irgendmau, hei mir mit der Band dä uraut Saau im Hirsche gfüllt

Ir Beiz hei mir gsoffe u gsunge u grölet, plagiert
Hei üsi chlyni Wäut gfyret, u hei nüt vo der grosse gwüsst
Ig o, eso jung, u so bring, u so chlyn, i ha gmeint, syg der Gröscht
Won i znacht mau im Äntelipark so ne starchi u grossi Frou ha küsst

Myner Heude spile Hockey, schutte uf der Züghusmatte
I der Badi hechte si vom Brätt, u i wär gärn so eine gsy wi die
Eso ne Wittwer Geru, Bärtschi Stifu, Lüthi Hardu
Gärber Rüedu, Zougg Emil, Scarnicci
I luege zue ne ueche, o no hüt
Wo scho fasch au höch obe i mym Heudehimu sy

Du mys Dorf im Ämmitau
I weiss no gnau, wie d mau bisch gsy
U i vergisse nie, was du mir alls hesch ggä
U niemer, niemer cha mirs näh
Was du mir alls hesch ggä
U niemer, niemer cha mirs näh

Am Sunntig ueche uf d Hohwacht u ache när zum Schanzeport
Teu gumpe höch u gumpe wyt u stürze ab so wi ne Stei
U pfyffegredi uf de Ski när aus zdürab a d Iufis u a Hockeymätsch
U üser Härz, die gumpe höch u gumpe wiud
U töne lut dür ds Tau, we üser gwunne hei

I gseh der Hösubuur ir Hösumatte bschütte, määje, höie
U i bi wider jung u schnäu u wiud u aus isch da u nüt isch gsy
U schön u gross stöh o no au di Böim dert obe ar Alleestrass
U au di aute Hüser, ds Fäud, mys Dorf, myni Wäut
Si läbt, nüt isch verby

Du mys Dorf im Ämmitau
I weiss no gnau, wie d mau bisch gsy
U i vergisse nie, was du mir alls hesch ggä
U niemer cha mirs näh
Was du mir alls hesch ggä
U niemer, niemer cha mirs näh